संत ज्ञानेश्वर महाराज पालखी सोहळ्याचे फलटण शहरात दि.28 रोजी आगमन,नगरपालिका प्रशासन सज्ज,शहरातील पालखी मार्ग चकाचक

फलटण – श्री संत ज्ञानेश्वर महाराज पालखी सोहळ्याचे फलटण शहरात  शनि.दिनांक 28 रोजी आगमन होत असून फलटण नगरपालिकेचे मार्फत माऊलीच्या स्वागताची तयारी पूर्ण झाली आहे. पालखी मार्गावरील रस्त्याचे डांबरीकरण करण्यात आले आहे.भाविकांना सर्व सोयी सुविधा चांगल्या प्रकारे उपलब्ध करण्यात येणार असल्याची माहिती मुख्याधिकारी निखिल मोरे यांनी दिली.

संतश्रेष्ठ ज्ञानेश्वर महाराज यांच्या पालखी आगमनाच्या पार्श्‍वभूमीवर फलटण पालिकेकडून रस्ते , आरोग्य , पाणीपुरवठा बाबतीत पूर्ण सज्जता झाली आहे. संतश्रेष्ठ ज्ञानेश्‍वर महाराज पालखी सोहळा २८ जून २०२५ रोजी फलटण मुक्कामी येत आहे. या पार्श्‍वभूमीवर फलटण नगरपालिका मार्फत चालू असलेली आणि झालेली कामे याबाबत मुख्याधिकारी निखील मोरे यांनी  सांगितले की , फलटण शहरातील रस्त्यांच्या डांबरीकरणाबाबत सार्वजनिक बांधकाम विभागाकडे तसेच भारतीय राष्ट्रीय राजमार्ग प्राधिकरणाकडे पालिकेकडून पाठपुरावा करण्यात आला असून वेळोवेळी झालेल्या पावसाच्या अडथळ्यातून पालखी मार्गाची आणि वाहतुकीच्या मार्गाची तात्पुरती डागडुजी पूर्ण झाली आहे. नुकत्याच झालेल्या अतिवृष्टीमुळे शहरातील पुलांचे तुटलेले रेलिंग तातडीने बसवण्यात आले असून नदीपुलावरून चालताना वारकरी यांना कोणताही धोका होणार नसल्याची दक्षता घेतली आहे. पालखी मार्गावरील दगड माती उचलण्याचे आणि स्वच्छता करण्याचे काम युद्धपातळीवर चालू असून यासाठी स्वतंत्र टीम नेमण्यात आलेली आहे.

वारकर्‍यांसाठी पिण्याच्या पाण्याची सोय म्हणून शहरातील प्रत्येक प्रमुख चौकात एक पाणपोईची व्यवस्था करण्यात येणार आहे. वारकर्‍यांचे पाण्याचे टँकर भरण्यासाठी पालिकेच्या पाणी पुरवठा केंद्रावर कायमस्वरूपी सुविधा उपलब्ध देण्यात आली आहे, याठिकाणी एकाच वेळी 8 पाणी टँकर भरू शकतील अशी व्यवस्था असून एक 10 हजार लिटर टँकर 7 ते 8 मिनिटे मध्ये भरून होईल,असे मुख्याधिकारी निखील मोरे यांनी नमूद केले आहे. 

वाहतूकीचे नियोजन करण्यासाठी वारकर्‍यांचे माल वाहतूक ट्रक व अन्य वाहनांसाठी विशेष मार्गाची आखणी केली जात आहे, असेही मुख्याधिकारी निखील मोरे यांनी सांगितले आहे. 

पालखी तळावर पावसामुळे अडचण निर्माण होवू नये यासाठी मुख्य रस्ता डांबरीकरण करणेत आले असून साईड पट्टी मुरुमाने भरण्यात आल्या आहेत. 2 जेसीबी आणि 2 ट्रॅक्टर तसेच 50 कर्मचारी यांच्या मदतीने पालखी तळाची स्वच्छता अंतिम स्वच्छता झाली आहे, पालखी तळावरील विद्युत रोषणाई लाईटसाठी 8 सॅटेलाईट पॉईंट, छोट्या – मोठ्या जनरेटरची सुविधा उपलब्ध करून देण्यात आलेली आहे.पालखी तळावरील दर्शन बारीची व्यवस्था पूर्ण झाली आहे. तसेच पालखी तळावर तात्पुरत्या शौचालयाची स्नान गृहची सुविधा व त्याठिकाणी लाईटची सुविधा देण्यात येणार आहे, असेही प्रसिद्धीपत्रकात स्पष्ट करुन वारकर्‍यांची फलटण शहरात गैरसोय होणार नाही यासाठी फलटण पालिका सर्वतोपरी खबरदारी घेणार असल्याचेही निखील मोरे यांनी सांगितले आहे.

पडणाऱ्या पावसाचा जोर पाहता यावर्षी पालखी तळावर लाल माती ऐवजी कमी जाडीची कच टाकण्याचे नियोजन केले असून पालखी सोहळा सुखकर होण्यासाठी ठीक ठिकाणी बॅरेकेटिंग करण्यात आले आहे.

यावर्षी प्रथमच जर्मन मंडप च्या माध्यमातून वारकरी सेवा केंद्र यशवंतराव चव्हाण हायस्कूल याठिकाणी उभे करण्यात आले असून 150 डॉक्टर यांच्या सहाय्याने या ठिकाणी वारकरी सेवा करण्यात येणार असून महाराष्ट्र शासनाच्या वतीने सदरचे केंद्र उभे झाले आहे. याठिकाणी महिला आणि पुरुष वारकरी यांचे साठी स्नान गृहची उभारणी काम युद्ध पातळीवर चालू आहे.

पालखी तळ तेथे कोणत्याही प्रकारचे हातगाडे , हॉटेल लागणार नाहीत आणि पालखी आगमनाच्या वेळी गर्दी होणार नाही या साठी नगरपालिकांचे फिरते पथक तैनात असून पोलीस विभागाची मदत याकामी घेण्यात येत आहे. 

पालखी तळावर आरोग्य विभाग मार्फत छोटे तात्पुरते हॉस्पिटल आणि दवाखाना तयार करणेत येत असून या ठिकाणी हिरकणी कक्ष आणि वारकरी यांचे सेवा साठी 20 फिजिओथेरपी चे डॉक्टर्स तैनात असणार आहेत.