फलटण — फलटण नगरपरिषद कार्यालयात काम करणाऱ्या व काही शासकीय कामानिमित्त येणाऱ्या स्तनदा मातांना त्यांच्या लहान बाळांना दूध पाजण्यासाठी सध्या आवश्यक ती सोय उपलब्ध नाही. परिणामी अशा मातांना अनेक अडचणींना सामोरे जावे लागत आहे. त्यामुळे फलटण शहरात ठीक ठिकाणी हिरकणी कक्ष स्थापन करावा अशी मागणी मनसेचे उपजिल्हाप्रमुख युवराज शिंदे यांनी निवेदनाद्वारे फलटण नगरपालिकेचे मुख्याधिकारी निखिल मोरे यांच्याकडे केली आहे.
भारताला स्वातंत्र्य मिळून सुमारे 75 वर्षे पूर्ण होऊन गेली नुकताच आपण अमृत महोत्सव साजरा केला परंतु स्त्रियांच्या वाटेला अजूनही उपेक्षाच आहे असे वाटते.हिरकणी कक्षाची मागणी केवळ सोयीसाठी नाही, तर ती महिलांच्या मूलभूत गरजांपैकी एक आहे. अनेक सरकारी धोरणांमध्ये याची तरतूद असूनही अद्याप आपले कार्यालयात व शहराच्या विविध ठिकाणी ही सुविधा उपलब्ध नाही.
फ.न.प. मुख्यालय व फलटण शहरात ठिकठिकाणी दररोज मोठ्या संख्येने महिला आपल्या लहान बालकांसोबत येत असतात. मात्र, त्यांच्यासाठी स्वतंत्र व सुरक्षित हिरकणी कक्ष उपलब्ध नसल्याने त्यांना उघड्यावर, असुविधाजनक ठिकाणी किंवा सार्वजनिक टॉयलेटमध्ये बाळांना दूध पाजावे लागते. ही स्थिती आरोग्यासाठी धोकादायक तर आहेच, पण त्यातून महिलांच्या गोपनीयतेलाही बाधा पोहोचते.
महिला सक्षमीकरण आणि मातृत्वाचा सन्मान राखण्यासाठी तसेच मातांना मूलभूत सुविधा पुरविण्यासाठी नगरपरिषद मुख्यालय व शहरातील इतर सार्वजनिक ठिकाणी “हिरकणी कक्ष” स्थापन करणे अत्यावश्यक झाले आहे. हा कक्ष स्तनदा मातांसाठी सुरक्षित, स्वच्छ व खासगी जागा असेल, जिथे त्या आपली बाळे आरामात स्तनपान करू शकतील.
शासनाने वारंवार निर्देशित करून सुद्धा आपले स्तरावर कार्यवाही होत नसेल तर स्त्रियांना अजूनही गैरसोयीचा सामना करावा लागतो असेच म्हणावे लागेलत री, आपल्या नगरपरिषद कार्यालयात आणि शहरात काही ठिकाणे आयडेंटीफाय करून तात्काळ हिरकणी कक्ष स्थापन करण्याची कार्यवाही करण्यात यावी. अशी मागणी युवराज शिंदे यांनी केली असून सदरचे निवेदन फलटण नगरपालिकेचे कार्यालयीन अधीक्षक मुस्ताक महात यांनी स्वीकारले.
