फलटणमध्ये लवकरच महिला व मुलींसाठी मोफत बस सेवा तसेच सुरक्षिततेसाठी सर्वत्र सीसीटीव्ही कॅमेरे बसविणार – नगराध्यक्ष समशेरसिंह नाईक निंबाळकर

फलटण – येत्या काही दिवसात महिला व मुलींसाठी फलटण शहरांमध्ये मोफत बस सेवा तसेच ठिकठिकाणी शौचालये उभे करण्याबरोबरच शहरातील चौका चौकामध्ये महिलांच्या सुरक्षितेसाठी सीसीटीव्ही कॅमेरे बसवि१णार असल्याचे फलटण नगरपालिकेचे नूतन नगराध्यक्ष समशेरसिंह नाईक निंबाळकर यांनी सांगितले.

 फलटण नगरपालिकेचे नूतन नगराध्यक्ष समशेरसिंह नाईक निंबाळकर यांचा नगराध्यक्षपदी निवड झाल्याबद्दल रक्षक रयतेचा न्यूज व इव्हेंट टीमच्या वतीने सत्कार करण्यात आला. त्यावेळी सर्वांशी वार्तालाप करताना ते बोलत होते. यावेळी माजी जेष्ठ नगरसेवक सुदामराव मांढरे, विद्यमान नगरसेवक सचिन अहिवळे उपस्थित होते. महिलांच्या सुरक्षेचे बद्दल बोलताना समशेरसिंह नाईक निंबाळकर यांनी फलटण शहरामध्ये अनेक ठिकाणी अतिक्रमणे बोकाळली असून ती अतिक्रमे काढून चौक मोठे केले जाणार आहेत तसेच येणाऱ्या जाणाऱ्या महिलांच्या सुरक्षेतेसाठी सर्वत्र सीसीटीव्ही कॅमेरे बसवण्यात येणार आहे. गेल्या कित्येक वर्षापासून महिलांसाठी शौचालय नसल्याच्या मुद्दा उपस्थित झाला असता त्यांनी येत्या दोन ते तीन महिन्यातच शहरातील प्रमुख ठिकाणी महिलांसाठी शौचालय उभारण्यात येणार असून ती स्वच्छ व अत्याधुनिक पद्धतीचे असणार आहेत. त्याचबरोबर यापूर्वी मागील बॉडीत सद्गुरु उद्योग समूह व महाराजा उद्योग समूह यांच्या वतीने महिलां व मुलींसाठी मोफत बस सेवा सुरू करण्याबाबत ठराव देण्यात आला होता मात्र त्या वेळच्या सत्ताधाऱ्यांनी तो चांगला विषय स्थगित केला होता. त्यांना जनतेचे प्रश्न सोडवायचे नव्हते त्यामुळे त्यांनी नेहमी चांगल्या कामांना विरोध केला. मात्र आता आम्ही महाराजा उद्योग समूह व सद्गुरू उद्योग समूह यांच्याबरोबर चर्चा करून महिला व मुलींच्या सुरक्षिततेसाठी शहरात मोफत बस सेवा सुरू करणार आहोत असे समशेरसिंह नाईक निंबाळकर यांनी सांगितले.

 फलटण मधील पाणी प्रश्नासंदर्भात बोलताना शहरांमध्ये अनेक ठिकाणी कमी दाबाने पाणीपुरवठा होतो तसेच अस्वच्छ पाणी मिळते याकडे मागील सत्ताधाऱ्यांनी पूर्णपणे दुर्लक्ष केले होते मात्र आता आम्ही सत्ता हाती घेताच पाणी प्रश्न सोडवण्याच्या दृष्टीने निर्णायक पावले उचलले आहेत अनेक ठिकाणी पाण्याच्या पाईपलाईन बदलण्यात येत आहेत तसेच संपूर्ण शहराला स्वच्छ व योग्य दाबाने पाणीपुरवठा व्हावा यासाठीचे नियोजन अंतिम टप्प्यात आलेले आहे लवकरच 100% शुद्ध पाणी फलटणकरांना मिळेल अशी ग्वाही समशेरसिंह नाईक निंबाळकर यांनी दिली.

 फलटणमधील रस्त्यांच्या दुरवस्थेबद्दल बोलताना शहरातील सर्व मध्यवर्ती रस्ते सिमेंटचे करण्याचा आम्ही निर्णय घेतलेला आहे त्यामुळे रस्ते चांगले होण्याबरोबरच ते दीर्घकाळ टिकणार आहेत रस्त्यांची कामे आमच्या काळात 100% चांगली आणि टिकाऊ होणार आहेत येत्या सहा ते आठ महिन्यात खड्डे मुक्त फलटण शहर पाहायला मिळेल असे समशेर सिंह नाईक निंबाळकर यांनी सांगितले.

 नगरपालिकेच्या सेतूमध्ये विविध प्रकारचे दाखले मिळण्याबाबत येणाऱ्या अडचणीच्या प्रश्नावर त्यांनी यामध्ये सुसूत्रता आणणार असून फलटणमधील काही नागरिक बाहेरगावी राहत असतात त्यांना कर भरणे अधिक सुकर जावे म्हणून ऑनलाइन सुविधा उपलब्ध करणार आहोत तसेच फलटण शहरातील नागरिक प्रामाणिकपणे कर भरत असल्याने त्यांना नगरपालिका निश्चितच चांगली सेवा देणार असून कर रूपाने मिळणाऱ्या पैशाचा वापर 100% विकासासाठीच आणि चांगल्या कामासाठीच केला जाणार असल्याचे समशेरसिंह नाईक निंबाळकर यांनी सांगितले. दर रविवारी शहरात  भरणारा आठवडी बाजार एकाच ठिकाणी भरविण्यात येणार असून तेथे सर्व सुविधा उपलब्ध करून देण्यात येणार आहे.  

यावेळी रक्षक रयतेचा न्यूज व इव्हेंट टीम मार्फत राहा पहिले जाणाऱ्या विविध उपक्रमांची प्रशंसा करून टीम बरोबर दिलखुलास गप्पा मारल्या.